Առցանց դասընթաց: Կառավարման գործիքների համալիր ժողովածու ղեկավարների համար

Ընդհանուր տեղեկություններ

Կառավարման գործիքների այս համալիր ժողովածուն նախատեսված է ԱլԳ երկրների (Արևելյան Եվրոպայի գործընկեր վեց երկրներ՝ Հայաստան, Ադրբեջան, Բելառուս, Վրաստան, Մոլդովա և Ուկրաինա) խմբագրությունների ղեկավարների համար:

Ժողովածուն միտված է աջակցելու անկախ լրատվական կազմակերպությունների խմբագիրների մենթորությանը և վերապատրաստմանը: Այն նպատակ ունի հիմնական փաստաթղթերի ձևանմուշների և օժանդակ տեսանյութերի միջոցով օգնելու խմբագիրներին նորությունների կառավարման հիմունքների և դրա գործնական իրականացման հարցում:

Տեխնիկական պայմաններ

Գործիքների համալիր ժողովածուն կիրառվում և բաժանվում է խմբագրություններին իբրև «EU4IM» («Եվրոպական միությունը՝ անկախ լրատվամիջոցների համար») ծրագրի փորձագետների տրամադրած բիզնեսի կառավարման մենթորության մաս: Այն առաջարկում է՝

• խելացի մոտեցում կազմակերպական կառուցվածքին (գծապատկերների նմուշօրինակներ, որոնք կարող են տեղայնացվել յուրաքանչյուր խմբագրությունում),
• տարբեր դերակատարների և գերատեսչությունների միջև փոխհարաբերությունների պարզաբանում,
• ընդհանուր երկընտրանքներն ընդգծող տեսանյութեր՝ փորձագետների խորհուրդներով։

Թիրախային խմբեր

Հիմնական խումբ՝ ԱլԳ երկրներում անկախ լրատվական խմբագրությունների խմբագիրներ և ղեկավարներ:

Երկրորդային խումբ՝ տեղական մենեջմենթ և բիզնես մենթորներ, որոնք օգնում են խմբագրություններին բարելավելու բիզնես գործունեությունը և հասնելու ֆինանսական կայունության:

Բովանդակություն

1. Ներածություն

Կառավարման ընդհանուր մոտեցումը և փոփոխության պատճառները
Մուլտիմեդիա պլանավորման և գործարկման խորհուրդներ
Եկամտի աղբյուրների դիվերսիֆիկացման խորհուրդներ

2. Լրատվական խմբագրության կառուցվածքի ուղեցույց

Կառուցվածքային դիագրամներ և հաստիքների անվանումներ
Տարբեր հաստիքների միջև կապերի պարզաբանում
Աշխատանքների նկարագրերի ձևանմուշներ

3. Հավասարության խթանման քաղաքականություն

Կանանց համար աշխատանքային հավասար հնարավորություններին աջակցող քաղաքականության ուղեցույց

4. Օժանդակ տեսանյութեր

Կարճ տեսանյութեր՝ տեղական և միջազգային փորձագետների մասնակցությամբ

1. Ներածություն

Այս ժողովածուն ներկայացնում է մեկ մոտեցում՝ նախատեսված տարբեր հարթակների լսարաններ սպասարկող լրատվական թիմերի կառավարման համար: Այն պարզաբանում է, թե ինչու մուլտիմեդիա բաղադրիչի ավելացումը կօգնի ձեր բիզնես մոդելին, ինչպես նաև կբարելավի ձեր՝ գործատուի հեղինակությունը:

Պրակտիկ օրինակ՝ BBC News-ի ամենօրյա ժողով

Յուրաքանչյուր աշխատանքային օրվա սկզբում BBC-ի լրատվական խմբագրությունն առավոտյան ժողով է անցկացնում, որը ղեկավարում է ավագ խմբագիրը կամ նորությունների բաժնի ղեկավարը: BBC News-ի բոլոր բաժինները ներկայացուցիչ են ունենում այդ ժողովին:

Կա նորությունների ընդհանուր օրագիր, որ պատրաստում է պլանավորման խմբագիրը: Վաղ առավոտից օրագիրը թարմացվում է վերջին զարգացումներով և քննարկվում է ժողովում` անդրադարձ կատարելով ինչպես պատմությունների մանրամասներին, այնպես էլ խմբագրական հարցերին: Ժողովը նաև դիտարկում է տվյալների վերլուծությունը՝ հասկանալու, թե ինչ արդյունքներ են գրանցում պատմությունները տարբեր հարթակներում: Առավոտյան ծրագրերի յուրաքանչյուր խմբագիր զեկուցում է առավոտյան զարգացումների և արձագանքների մասին:

Բոլորին խրախուսվում է մասնակցել և ինչ-որ բան ասել իրենց պլանների մասին կամ պատմությունների վերաբերյալ խմբագրական տեսակետներ հայտնել:

Խմբագիրները միասին քննարկում են դիտանկյունների կարևորությունը՝ ներկայացնելով իրենց գիտելիքներն ու տեղեկությունները: Մասնակիցները տեղեկանում են բացառիկ հարցազրույցների և լուսաբանման գաղափարների մասին: Ժողովի իմաստն այն է, որ բոլոր լրատվական բաժիններն իմանան, թե ինչ են անում մյուսները: Այնուհետև խմբագիրները կարող են որոշել, թե որ պատմությունների հետ կապված պետք է հետագա քայլեր ձեռնարկեն և ինչպես համապատասխան ձևով պատմեն դրանք իրենց լսարանի և հարթակի համար: Օրվա ընթացքում նրանք տարածում են ստացվող նորանոր տեքստեր, տեսանյութեր և լուսանկարներ:

Մեծ պատմության առկայության դեպքում, ժողովը լսում է անմիջապես լրատվական թղթակցին, կամ երբ բարդ իրավական խնդիր կա, կարող է իրավաբան միանալ, որպեսզի բոլորը միասին ստանան ճիշտ իրավական տեղեկություն: Երկրորդ ժողովն անց է կացվում ավելի ուշ՝ նորությունները թարմացնելու և հաջորդ օրվա ծրագրերը պլանավորելու համար:

BBC News-ն ունի տեսանյութերի և լուսանկարների ընդհանուր օգտագործման հարթակ, որպեսզի նյութը վերբեռնվելուց հետո բոլոր թիմերի համար մատչելի լինի: Մյուս թիմերը կարող են կարդալ ավարտված սցենարները՝ նվազագույնի հասցնելու հետազոտության և փաստերի ստուգման կրկնօրինակումը:

Ժամանակի ընթացքում հանդիպման ձևաչափը փոխվում է՝ ավելի կենտրոնանալով թվայինի վրա՝ պայմանավորված նրանով, որ BBC News-ն սկսել է ավելի շատ ուշադրություն դարձնել սոցիալական մեդիային և թվային տեսանյութերին:

Եկամտի աղբյուրների դիվերսիֆիկացում

Ֆինանսական կայունությունը ժամանակակից լրատվական խմբագրությունների ամենամեծ մարտահրավերներից է: Մուլտիմեդիա արտադրանքի ավելացումը կարող է օգնել ձեզ ստեղծելու եկամտի նոր աղբյուրներ՝ միևնույն ժամանակ պահպանելով նաև որակյալ բովանդակությունը։ Դա կօգնի ապագա փոփոխությունների նկատմամբ խմբագրությունների դիմակայունության մեծացմանը: Ղեկավարները պետք է պահպանեն խմբագրական և վճարովի բովանդակության հավասարակշռությունը:

Առցանց մեդիայի համար հարկ է դիտարկել երկամտի որոշ աղբյուրներ՝

Ավանդական գովազդ. բաններներ, աշխատանքային սեղանին և բջջայինի էկրանին բացվող պատուհաններ (Pop-ups), տեսանյութերի դիտումից առաջ հայտնվող կարճ գովազդներ (Pre-rolls), վճարված տեսանյութ՝ հոդվածում, RSS հոսք գործընկեր կազմակերպություններից, բջջային հավելվածի մոնետիզացիա:

Բնական գովազդ (Native advertising). բովանդակության մարքեթինգ, բովանդակության գովազդ կանոնավոր հիմունքներով՝ ամսական բաժանորդագրություն գործընկեր կազմակերպությունների և անհատների համար սահմանված վճարով (երկարաժամկետ), վճարված բովանդակություն, թեմայի կամ կոնկրետ հոդվածի հովանավորում:

Կայքում բաժանորդագրություններ ընթերցողների համար (վճարովի բովանդակություն). տարբեր ծառայությունների համար ընթերցողների ամսական և տարեկան բաժանորդագրություններ՝ նորությունների, մասնագիտացված բովանդակության մատակարարում, խաղեր և ընթերցողների ակումբին անդամակցություն: Հատուկ ծառայություններ ընթերցողների համար, օրինակ՝ բժշկի, իրավաբանի խորհրդատվություն։

Էլեկտրոնային առևտրի տարրեր. գործընկերային մարքեթինգ (Affiliate marketing), ձեր սեփական էլեկտրոնային առևտրի ծառայությունների ներդրում տեղեկատվական վեբ պորտալներում:

Սոցիալական մեդիա հարթակների օգտագործում. YouTube-ում տեսանյութերի մոնետիզացիա: Ապրանքի տեղադրում ֆեյսբուքյան էջերում և խմբերում, ապրանքների տեղադրում TikTok-ում և Instagram-ում:

Արտաքին միջոցառումների կազմակերպում. հովանավորվող կոնֆերանսներ, փառատոներ, մեդիա: Լրատվական աշխատակազմը կարող է կազմակերպել միջոցառումներ:

Ծառայությունների մատուցում. ԶԼՄ-ներին հարցազրույցներ տալու ուսուցում, լրագրողների ուսուցում։ Տեղական նորությունների տարբերակի առաջարկում այլ կազմակերպությունների:

Միջազգային կառույցների և կազմակերպությունների իրականացրած ֆինանսավորում. հատուկ բովանդակության արտադրություն, որը ֆինանսավորում են դոնոր կազմակերպությունները:

Տեխնոլոգիական թիմի (ծրագրավորողների) ծառայությունների վաճառք. հաճախորդների համար նոր կայքերի ստեղծում և առկա ծրագրերի վաճառք:

Խմբագրությունները կարող են օգտվել մի շարք ֆինանսավորման աղբյուրներից՝ ապահովելու կայուն եկամուտը և բիզնեսի շարունակականությունը: Իրականացումը կպահանջի սերտ հաղորդակցություն խմբագրության, վաճառքի և մարքեթինգի թիմերի միջև:

Պրակտիկ օրինակ՝ «Պալիտրա մեդիա»-ի խմբագրական և մարքեթինգային ֆինանսական ռազմավարություն

«Պալիտրա մեդիա»-ում լրատվական խմբագրության թիմն առանձնացված է մարքեթինգի/վաճառքի թիմից: Երկուսն էլ և՛ պլանավորում, և՛ բյուջե են կազմում իրարից անկախ՝ աշխատելով մայր ընկերության ռազմավարությանը համապատասխան:

Տարեսկզբին նրանք մանրամասն ֆինանսական պլան են գրում առաջիկա 12 ամիսների համար։ Նրանց միջև կա համաձայնագիր, որը բացառիկ իրավունքներ է տալիս մարքեթինգի/վաճառքի ընկերությանը՝ վաճառելու խմբագրության արտադրանքը և պահելու շահույթի 20%-ը։ Խմբագրությունը մարքեթինգային ծառայությունների համար վճարում է ֆիքսված վճար:

Երկու ոլորտների հաջողությունն ու զարգացումը երկուստեք հետաքրքրություն է ներկայացնում։ Միևնույն ժամանակ, երկու թիմերն էլ մտածում են իրենց եկամուտներն ինքնուրույն ավելացնելու մասին և գաղափարներ են ծնում, թե ինչպես գումար վաստակել բովանդակությունից։

Խմբագրական + վաճառքի + մարքեթինգի թիմերի շաբաթական ժողովներում գաղափարները հաստատվում են, և որոշվում է, թե ով է դրանք իրականացնելու։ Երբեմն խմբագրությունն ինքնուրույն է ներդնում մոնետիզացիան՝ առանց գովազդային խմբի: Օրինակ՝ կայքում բաժանորդագրություններ ընթերցողների համար, ծառայություններ ընթերցողների համար և միջազգային կազմակերպությունների կողմից ֆինանսավորվող նախագծերի իրականացում:

Մոնետիզացիայի նոր գաղափարների պլանավորման և իրականացման համար արվող քայլեր

1. Գաղափարի գեներացում և նախաձեռնում (հիմնականում ամենշաբաթյա խմբագրական ժողովների ժամանակ): Յուրաքանչյուր խմբագիր մոտիվացված է ներկայացնելու մոնետիզացիայի վերաբերյալ սեփական մտքերը,
2. գաղափարի վերլուծություն` շուկայի հետազոտություն, միջազգային մեդիայի և մրցակիցների փորձ: Նախագծի բարդության և շահութաբերության վերլուծություն,
3. խորհրդատվություններ տեխնիկական և մարքեթինգային թիմերի հետ,
4. գաղափարի հաստատում և բիզնես պլանի ստեղծում,
5. իրականացում,
6. փորձարկում,
7. գործարկում,
8. խթանում,
9. արդյունքների չափում:

«Պալիտրա մեդիա»-ի կողմից իրականացված հաջողված ծրագրի օրինակ է Mkurnali.ge բժշկական կայքի «բժշկի ծառայությունը»: Ընթերցողները կարող են կոնկրետ բժշկի հարց տալ և պատասխան ստանալ:

2. Լրատվական խմբագրության կառուցվածքի ուղեցույց

Սրանք կազմակերպությունների կառուցվածքի նմուշներ են, որոնք կարող են օգնել ղեկավարներին, որոնք մուլտիմեդիա աշխատանքը մեծացնելու նպատակով մտածում են խմբագրությունը վերակառուցելու մասին:

Սրանք մտածված են իբրև պատկերավոր ուղեցույցներ, որոնք կարող են հարմարեցվել և օգնել խմբագրության ղեկավարներին մշակելու համապատասխան կառուցվածք՝ ըստ առկա սեփական ռեսուրսների և առաջնահերթությունների:

Կառուցվածքային դիագրամներ

• Ձևանմուշ՝ խոշոր մուլտիմեդիա խմբագրության համար
• Պարզեցված ձևանմուշ՝ ավելի փոքր մուլտիմեդիա խմբագրության համար

Բացատրություն

Ավելի մեծ լրատվական կազմակերպության համար նախատեսված այս մոդելում կան առցանց/սոցիալական մեդիաների, հեռուստատեսության և ռադիոյի առանձին խմբագիրներ: Հաջորդ բաժնում ներկայացված աշխատանքի նկարագրերը ավելի շատ տեղեկություններ են տալիս այդ հաստիքների աշխատանքի վերաբերյալ, օրինակ՝ մուլտիմեդիա լրագրողները կարող են բովանդակություն ստեղծել բոլոր հարթակների համար՝ խմբագիրների վերահսկողության ներքո, կամ նրանք կարող են համատեղել երկու գործառույթ՝ աշխատելով որպես օպերատոր և լրագրող:

Կայքերը կունենան նեղ ուղղվածության էջեր, օրինակ՝ «նորություններ», «սպորտ», «վերլուծություններ», «կանայք», «ապրելակերպ» և «տեսանյութեր» (գուցե մարդկային պատմություններ): Այս բովանդակության մի մասը կաշխատի նաև սոցիալական մեդիայում և այլ հարթակներում:

Որոշ խմբագրություններ ունեն լրատվական գործակալության թիմ՝ կազմված մուլտիմեդիա լրագրողներից: Նրանք գրում են պատմություններ և հոդվածներ, որոնք վաճառվում են արտաքին մեդիա ընկերություններին: Այս լրագրողները կարող են նաև աշխատել այլ ուղղություններով, ինչպիսին են ռադիոհաղորդումները:

Տվյալների վերլուծաբանը կմշտադիտարկի տարբեր հարթակների թրաֆիկն ու լսարանները և կտեղեկացնի նորությունների խմբագիրներին, թե որ պատմություններն են լավ կարդացվում կամ դիտվում: Այս տեղեկությունը կարող է տարածվել խմբագրության բոլոր բաժիններում և կարող է օգնել խմբագրական որոշումներ կայացնել՝ չկապակցված հարթակների վերաբերյալ, ինչպիսին է հեռուստատեսությունը:

Լրատվական խմբագրությունը կարող է ունենալ խմբագրական բովանդակության պրոդյուսերների/գրողների հատուկ ստորաբաժանում, որոնք աշխատում են ինչպես գովազդային թիմի, այնպես էլ նորությունների խմբագիրների հետ՝ համացանցի կամ սոցիալական մեդիայի համար ֆինանսավորվող բովանդակություն արտադրելու համար:

Խոշոր մեդիա կազմակերպությունը կունենա գովազդային, ՄՌ-ի (մարդկային ռեսուրսների) և տեխնիկական թիմեր, որոնք կաջակցեն ողջ ընկերությանը:

Տեխնիկական թիմը կաշխատի բիզնեսի բոլոր ուղղություններով, ներառյալ ամենօրյա արտադրությունը, պլանավորումը և նորարարությունը, վեբ թարմացումները և ցանկացած այլ գործողություն:

Մարդկային ռեսուրսների բաժինը աջակցում է ղեկավարությանը՝ անձնակազմի հավաքագրման և ուսուցման, ինչպես նաև աշխատակիցների վարձատրության, պայմանագրերի և քաղաքականության կազմակերպման գործում, ինչպիսիք են մայրության նպաստը և կարիերայի զարգացումը: Աշխատավայրում հավասարությունը բարելավելու համար նրանք կարող են աշխատել խմբագիրների հետ:

Որոշ ավելի խոշոր կազմակերպությունների մոտ, հնարավոր է, ցանկություն լինի դիտարկելու ներքին ուսուցման ծրագիր ունենալու տարբերակը՝ ուղղված նոր տաղանդներ գտնելուն, ինչպիսին օրինակ «Պալիտրա մեդիա»-ի 12-ամսյա սխեման է, որը հրավիրում է սոցիալական մեդիայով զբաղվող փորձնակների, որոնցից ոմանք հետագայում մնում են որպես լրագրող:

Հաղորդակցությունը ուշադրւթյան արժանի կարևոր ոլորտ է, և որոշ խոշոր կազմակերպություններ կարող են ներգրավել հաղորդակցության մասնագետի: Հակառակ դեպքում ղեկավարները կարող են ապահովել կարևոր տեղեկությունների փոխանցումը ողջ աշխատակազմին մի քանի ուղիներով: Նրանք պետք է նաև թույլ տան աշխատակազմին հեշտությամբ արձագանքել ղեկավարներին և երաշխավորեն, որ նրանք կարող են անխոչընդոտ խոսել ինչ-որ մեկի հետ այն խնդիրների մասին, որոնց բախվում են իրենց աշխատանքում:

Բացատրություն

Այս մոդելն ընդգրկում է մուլտիմեդիա լրագրողների շատ ավելի փոքր թիմ, որը զբաղվում է ինչպես վեբ, այնպես էլ սոցիալական մեդիայի արտադրանքով: Հնարավոր է՝ լրտվական խմբագրություններին անհրաժեշտ լինեն կայքերի մի քանի խմբագիրներ՝ կախված խմբագրության չափից, բայց մեկ խմբագիրն էլ կարող է վերահսկել ամբողջ բովանդակությունը և ղեկավարել բոլոր լրագրողներին:

Այս ավելի փոքր խմբագրությունը կրկին ունի տվյալների վերլուծաբան, որը մշտադիտարկում է թրաֆիկը, և այն կարող է ունենալ փոքր լրատվական գործակալություն, ինչպես նաև բուն բովանդակություն ստեղծող՝ եկամուտն ավելացնելու համար:

Այն կարող է ունենալ ՄՌ մենեջեր, որոշակի տեխնիկական աջակցություն և գովազդով զբաղվող անձնակազմ, որոնք կաշխատեն բոլոր լրագրողների հետ միասին: Այլապես ՄՌ կառավարումը (աշխատանքի ընդունումը, պայմանագրերը և անձնակազմի զարգացումը) կիրականացնի լրատվական բաժնի մենեջերը:

Ընդհանուր օգտագործման տեսանյութերը և հոդվածները բովանդակության առանցքային մասն են կազմելու. բոլոր տեղեկությունները հասանելի կլինեն մյուս լրագրողներին և խմբագիրներին, և բազմաթիվ պատմություններ հարմարեցված կլինեն տարբեր հարթակների համար՝ առավելագույնի հասցնելու դրանց ազդեցությունն ու լսարանի ընդգրկումը:

Աշխատանքի նկարագրերի ձևանմուշներ

Այս բաժնում ներառված են որոշ աշխատանքներին վերաբերող առանձնահատկությունների օրինակներ՝ ցույց տալու, թե ինչպես կարելի է ձևակերպել դրանք և օգնելու բացատրել, թե ինչ կարող է ընդգրկել հաստիքներից յուրաքանչյուրը: Դրանք կարող են փոփոխվել՝ ըստ ձեր խմբագրության կարիքների:

Նոր աշխատակիցներ ընդունելիս կամ մարդկանց հաստիքները փոխելիս օգտակար է ունենալ աշխատանքի նկարագրեր և պայմանագրեր, որպեսզի և՛ աշխատողը, և՛ գործատուն հստակ հասկանան, թե ինչ է ակնկալվում:

Դրանք կարող են նաև օգնել ձեզ՝ աշխատանքի ընդունելու լավագույն թեկնածուներին՝ համոզվելով, որ նրանք տիրապետում են նախապես ձեր որոշած և պահանջվող հիմնական հմտություններին:

• Ձևանմուշները ներառում են աշխատանքի համառոտ նկարագիրը, հաստիքի համար պահանջվող հմտությունները, ժամերի ու աշխատավարձի չափի հուշումը:
• Այս ժողովածուում ներառված ձևանմուշները նախատեսված են ավագ և կրտսեր անձնակազմի համար։ Դրանք են՝ մուլտիմեդիա գործարկման խմբագիրը, մուլտիմեդիա լրագրողը, սոցիալական մեդիա պրոդյուսերը և տվյալների վերլուծության պրոդյուսերը:
• Ներառված են նաև մարքեթինգի և գովազդի վաճառքի ոլորտներից որոշ ոչ լրագրողական աշխատակիցներ, որոնք համագործակցում են լրատվական խմբագրության հետ:
• Աշխատանքի բոլոր նկարագրերում նշում կա ձեր ընկերության խմբագրական ուղեցույցների մասին: Սրանք ուղենշային սկզբունքների մի համախումբ են, որոնք կարող են գրվել ղեկավարության կողմից և հասանելի լինել ողջ աշխատակազմին՝ օգնելու նրանց ձեր նպատակներին հասնելու համար տարվող աշխատանքում: Ուղեցույցները կսահմանեն ձեր կազմակերպության լրատվական արժեքները և կարող են թարմացվել՝ ըստ մեդիայում զարգացումների պահանջների (օրինակ՝ սոցիալական մեդիայի ուղեցույցները կարող են փոփոխվել տեխնոլոգիներին զուգընթաց):

Պրակտիկ օրինակ՝ «Պալիտրա մեդիա»-ի մուլտիմեդիա խմբագրություն

«Պալիտրա մեդիա»-ն Թբիլիսիում (Վրաստան) գործող հաջողակ մեդիա կազմակերպություն է, որը ղեկավարում է թերթ (տպագիր մամուլ), ինչպես նաև՝ հեռուստատեսային և ռադիոկայաններ, կայքեր և սոցիալական մեդիա (հիմնականում Facebook):

Այս կազմակերպչական դիագրամը ցույց է տալիս, թե ինչպես է այդ լրատվական կազմակերպությունը կարողացել դիվերսիֆիկացնել իր վեբ թիմը սոցիալական մեդիայի և թվային լրագրության շնորհիվ:

Այն ունի մուլտիմեդիա լրագրողներ, որոնք աշխատում են տարբեր հարթակներում:

3. Խմբագրություններում կանանց հավասարության խթանման քաղաքականություն

Գենդերային զգայունության հետ կապված խնդիրների լուծումը կարող է բազմաթիվ օգուտներ բերել ձեր կազմակերպությանը՝ ինչպես կազմակերպության ներսում այնպես էլ դրանից դուրս: Առաջինն արտահայտվում է աշխատանքից բավարարվածությամբ և ձեր աշխատակիցներին պահպանելով, իսկ երկրորդը՝ գովազդատուների և արտաքին ֆինանսավորող մարմինների կողմից դրա ընկալմամբ:

Համաշխարհային կազմակերպությունների (ինչպիսին է ՄԱԿ-ը) նպատակն է խթանել գենդերային հավասարությունը: ՄԱԿ-ը դա դիտարկում է ոչ միայն որպես մարդու հիմնարար իրավունք, այլև անհրաժեշտ հիմք՝ խաղաղ, բարգավաճ և կայուն աշխարհի համար:

4. Օժանդակ տեսանյութեր՝ բոլոր լեզուներով ենթագրերով

1. Բարձրագույն ղեկավարության խորհուրդներ մուլտիմեդիա խմբագրություն կառավարելու վերաբերյալ. լրատվական բաժնի ղեկավարը խոսում է այն մասին, թե ինչ են սովորել մուլտիմեդիա ձևաչափի անցնելուց հետո խմբագրություն ղեկավարելուց:
   (Նատալյա Մումլաձե, «Պալիտրա» մուլտիմեդիա խմբագրության ղեկավար, Թբիլիսի, Վրաստան)
2. Ինչ եմ ակնկալում իմ գործատուից և ինչու եմ նախընտրում աշխատել այստեղ. մուլտիմեդիա լրագրողը բացատրում է, թե ինչ են իրենք փնտրում աշխատանքում, և ինչն է իրենց ստիպում մրցակցային շուկայում մնալ նույն գործատուի մոտ:
   (Սալոմե Աբուլաշվիլի, մուլտիմեդիա լրագրող, Թբիլիսի, Վրաստան)
3. Ինչպես օգուտ քաղել գենդերային հավասարությունից. քաղաքականության ավագ հետազոտողը բացատրում է, թե ինչպես ընկերությունները կարող են ավելին անել մայրության իրավունքների հարցում, և ինչու դա օգտակար կլինի նրանց, ինչպես նաև իրենց աշխատակիցների համար:
   (Դավիթ Քեշելավա, ISET-ի (Թբիլիսիի տնտեսագիտության միջազգային դպրոց) ավագ հետազոտող)
4. Ինչպես մուլտիմեդիա դարաշրջանում ճիշտ մարդկանց աշխատանքի ընդունել. լրատվական բաժնի ղեկավարը բացատրում է, թե ինչ քաղաքականություն է պետք է ներդնել լավագույն անձնակազմը ստանալու համար, և ինչպես թվային դարաշրջանում ճիշտ մարդկանց աշխատանքի ընդունել:
   (Լիզ Գիբոնս, լրատվական բաժնի գործադիր խմբագիր, BBC-ի համաշխարհային ծառայություն, Լոնդոն, ՄԹ)
5. Ինչպես գումար աշխատել լրագրությամբ. ավագ խմբագիրը խոսում է այն մասին, թե ինչպես է կարելի կառավարել լրագրության մոնետիզացիայի և խմբագրական վերահսկողության միջև գոյություն ունեցող հակասությունը։
   (Ֆիլիպս Լաստովսկիս, «Դելֆի» կայքի գլխավոր խմբագիր, Ռիգա, Լատվիա)
6. Ինչպիսի՞ն կլինեն նորությունների հաջորդ 5 տարիները: Միջազգային լրատվական առաջատար կազմակերպության ավագ ղեկավարը մեզ ներկայացնում է, թե ինչ նշանակալի զարգացումներ են տեղի ունենում նորությունների ոլորտում, և ինչի վրա են կենտրոնանում ղեկավարները:
   (Դոմինիկ Բոլ, BBC News-ի խմբագրության փոխտնօրեն, Լոնդոն, ՄԹ)