EU4Culture ევროკავშირის მიერ დაფინანსებული პროექტია, რომელიც 2021 - 2024 წლებში ხორციელდება. იგი მხარს უჭერს კულტურისა და შემოქმედებითი სექტორის გაძლიერებას აღმოსავლეთ პარტნიორობის ექვს ქვეყანაში: აზერბაიჯანი, ბელარუსი, მოლდოვას რესპუბლიკა, საქართველო, სომხეთი, უკრაინა

პროექტის მთავარი მიზანია, ხელი შეუწყოს კულტურის როლის გაზრდას ეკონომიკური და სოციალური განვითარების პროცესში.
კერძოდ, პროექტი მიზნად ისახავს:
- გააძლიეროს კულტურის სექტორი, როგორც ეკონომიკური განვითარების მნიშვნელოვანი მამოძრავებელი ძალა.
- ხალხთა შორის მშვიდობიანი ურთიერთობებისა და ცოდნის გაზიარების მიზნით ხელი შეუწყოს კულტურათაშორის დიალოგს.
- მარეგულირებელი პროცესების მხარდაჭერისა და პოლიტიკური დიალოგის გზით გააძლიეროს კულტურის სექტორის ადგილობრივი მმართველობა.

პროექტი EU4Culture
- დაეხმარება ქალაქებს შეიმუშაონ და განახორციელონ კულტურის განვითარების სტრატეგიები: თითოეული ქვეყნიდან მაქსიმუმ სამი ქალაქი მიიღებს 30,000 ევროს ოდენობის გრანტს კულტურის განვითარების სტრატეგიის მოსამზადებლად, მათგან კი შეირჩევა ერთი, რომელიც მოიპოვებს 300,000 ევრომდე დაფინანსებას საკუთარი სტრატეგიის განსახორციელებლად.
- დააფინანსებს ადგილობრივ და რეგიონალურ ფესტივალებს, კულტურულ და ინოვაციურ პროექტებს.
- გასცემს მობილობის გრანტებს ხელოვნებისა და კულტურის სფეროს წარმომადგენლებისთვის.
- მხარს დაუჭერს ქალაქებს შესაძლებლობების გაძლიერების მიმართულებით.